Góð setning sögð af ókunnugum manni á Austurvelli:

Á Sjómannadaginn lá ég á Austurvelli. Þá var ég búin að liggja aðeins á bryggjunni niðri á höfn til þess að samgleðjast sjómönnum svo og að liggja líka upp í rúmi til að samgleðjast rúmliggjandi sjúklingum.
Þar sem ég lá niðri á Austurvelli, horfði upp í heiðan himininn og hugsaði um camelberta, kampavín, kavíar, flauel og karlmenn, sá ég lítin depil færast fyrir sólu. Við nánari athugun kom í ljós að þar var gasblaðra í páfagaukslíki á ferð. Eitthvert vísitölubarnið með vísitölufjölskyldu sinni hefur þarna misst blóm úr blómahafi sínu sem hefur ákveðið hefja nýtt líf á sólinni og var nú á mikilli ferð þangað.
Þá heyrði ég ókunnugan mann einn tauta við félaga sína:

"Sjá, þar heldur páfagaukur einn á fund forfeðra sinna".

Gasblöðrupáfagaukurinn sveif þá inn í sólargeisla er færði hann að hliði Lykla Péturs er lauk strax upp fyrir honum, enda óheillavænlegt að stöðva gasblöðrupáfagauk í sjöunda himni vegna nýfengis frelsis. Þá sveif gasblöðrupáfagaukurinn inn í landið sem Lykla Pétur er dyravörður af, án allra skílríkjavandamála því að aðeins koma einstaklingsins er skilríki í sjálfu sér.
Loks hefur hann líklegast svifið til allra hinna gasblöðrupáfagaukanna sem hafa glatast síðan á 14. öld. Bros myndast á andliti páfagauksins okkar og saman svífa allar kynslóðir gasblöðrupáfagauka um sali eilífðarinnar, borðandi kavíar, kampavín og camelberta...
...þangað til að þeir verða notaðir af óforskömmuðum englaóbermum til þess að svívirða raddböndin...

Gott samtal ókunnugs fólks:

Tvær konur um sextugt sitja og borða hádegismat úti í sólinni, með þeim er maður um fertugt.

Kona 1: Hlín ætlar víst ekki að skíra barnið sem hún er að fara að eiga.
Kona 2: Er það satt? Þetta unga fólk! Þetta er einhver tíska!
Kona 1: Þetta er alveg óskiljanlegt, hvað ætlar þetta unga fólk að gera þegar eitthvað bjátar síðan á, einhverjir erfiðleikar, hvert ætlar það eiginlega að leita ef ekki í trúna?
Maðurinn: ...Unga fólkið? ..Það fær sér bara jónu..
Konurnar báðar: (þögn lengi)... nú já..(dauflega kinka þær kolli, skilningsvana á nútímanum)..

Ég hugsaði með mér: Já nú er það annaðhvort að skíra eða verða jónureykingarmanneskja..

Svala sendi okkur hér á nýopnuðu útibúi Gefmérfive á Azora-eyjum e-mail:

Halló Halló!
Ég er á Mogganum að vinna, ég er að gera smáauglýsingar.
Ég er þegar búin að gera tvær.
Sú fyrri var svona:

Fólk sem smjattar á tyggjói athugið:
Ef þið smjattið í nærveru minni þá ríf ég úr ykkur tunguna.
Sumarkveðjur úr bongóblíðunni!
Svala

sú seinni var svona:

Ert þú útvarpskonan sem að smjattar alltaf mikið?
Ef já, segðu mér þá hvar þú átt heima og ég kem og tala við þig.
Ekki vera hrædd, vertu bara ein heima og helst með opinn muninn og með gripagóða töng við höndina. Við ætlum bara að nota hana til að grilla með! ...voða góðan mat..hmm
Svala

bíbí